Asean summit suportado sa mga Muslim-Aurengzeb

Hugtanong gisupor-tahan sa mga Muslim dinhi sa rehiyon ang umaabot nga 12th Association of Southeast Asian Nation (Asean) Summit sa Disyembre niining tuiga.

Kini ang gipadayag sa Banat News sa tigpamaba ug acting chief sa settlement division sa Office of Muslim Affairs nga si Ali Aurengzeb sa gihimong pagpakighinabi niini kagahapon.

Matud pa niya nga ang ilang pagsuporta ilang gipakita pinaagi sa pagtabang sa kagamhanan alang sa pagpatunhay sa kahapsay ug kalinaw atol sa maong kalihokan.

Kini ilang gihimo pinaagi sa higpit nilang pag-monitor sa mga langyaw ug dumoduong nga mga Muslim nga mosulod dinhi sa Sugbo.

Gipaniguro ni Aurengzeb nga ang kapin sa usa ka gatus nga gidaghanon sa mga Muslim nga ania karon dinhi sa rehiyon pulos mahigugmaon sa kahapsay ug kalinaw.

Sumala pa niya nga mga magpapatigayon kini ug dako usab ang tinguha nga makaabag sa kagamhanan alang sa gidamgong kalambuan sa nasud.