Compromised ordinance sa Mandaue PUJ nadugay

Mosamot kadugay ang pagpaabot sa mga drayber sa Mandaue-Jones nga rota sa compromised ordinance nga magtugot kanila nga makapadayon na sa pagpamasahero lahos sa Osmeña Boulevard ug Colon Area.

Kini human gibutyag ni Konsehal Sylvan Jakosalem, tsirman sa committee on transportation nga wala mahinayon ang gitakda unta nga final deliberation kagahapon sa maong ordinansa nga gipangamahanan ni Konsehal Jocelyn Pesquera.

Matud sa konsehal nalimtan ni Pesquera ang pag-apil sa maong compromised ordinance sa agenda atol sa sesyon kagahapon gumikan kay mibakasyon karon ug milarga sa gawas sa nasud si Pesquera.

Apan gipasalig ni Jakosalem nga matakda gyud ang pag-agenda sa maong ordinansa aron mapahigayon na ang pag-aprobar niini atol sa sesyon sa konseho sunod semana ug ning higayona siya na maoy mangusog aron masukip kini sa agenda.

Ang maong ordinansa maoy gipaabot nga makahatag og kasulbaran sa maong suliran gumikan kay tugotan na man unya nga makalahos sa Osmeña Boulevard ang mga Mandaue-Jones nga rota.

Apan giklaro diha sa maong ordinansa nga katunga lang sa 400 kapin ka mga PUJ sa Mandaue ang makapadayon og pamasahero lahos sa siyudad sa Sugbo ug ang katunga niini ang adto na lang kutob sa Ayala Terminal.