Minus ang dengue karon

Mas minus ang nataptan sa sakit nga dengue dinhi sa dakbayan sa Sugbo karong tuiga kun itandi sa milabay'ng tuig sa susamang kwarter.

Gikan sa Enero ning tuiga hangtud sa Hunyo 17, mikabat og 255 ang tanang kaso sa dengue nga natala dinhi sa dakbayan ug walay namatay.

Kini mas ubos kun itandi sa 402 ka mga kaso sa dengue nga natala dinhi sa dakbayan sa milabay'ng tuig sa susamang kwarter.

Subay kini sa labing uwahing pakisusi nga gihimo sa Cebu City Health Department ubos sa City Epidemiology Statistic and Surveillance Unit (CESSU).

Hinuon wala pay labot niini ang usa ka otso anyos nga bata didto sa Kalunasan nga namatay sa sakit nga dengue niadtong miaging semana.

Ang mga barangay nga nahimutang dinhi sa urban areas apil na ang Kalunasan maoy gitumbok nga adunay labing daghan og kaso sa dengue karung tuiga nga mikabat ngadto sa 88 ka kaso.

Ang City Health Department pinaagi ni Dra. Fe Cabugao kanunay'ng mipahimangno sa publiko nga batasanon ang pagpanglimpyo kanunay sa palibot sa pinuy-anan niini matag adlaw ug siguradohong mayabo ang mga magpundo nga tubig nga maoy itlogan sa lamok nga magdala sa dengue.

Ang dengue sagad mosaka niining panahon sa ting-ulan ug nunot niini giawhag sa City Health ang publiko nga batasanon usab ang pagpa-aso kun pagdaob sa matag hapon aron mabungkag ang mga lamok nga magpundo sa usa ka lugar.