Sunog sa MEPZ-2; P5M ang danyos

Gibanabanang P5 milyones ang danyos nga gibilin sa usa ka pabrika sa mga panapton sulod sa Mactan Export Processing Zone 2 sa Basak, Lapu-Lapu sa milabay'ng gabii.

Ang nasunog mao ang PANFIL Sportswear Inc. nga gidumala sa mga Taiwanese Nationals diin usa kini ka garments factory nga nahimutang sulod sa MEPZ 2 sa Basak, Lapu-Lapu.

Base sa imbestigasyon ni SFO2 Rodrigo Igot Jr. ug SFO1 Atilano Berido sa Lapu-Lapu City Fire Station nasayran nga nagsugod ang sunog sa warehouse sa maong establisamento diin gidudahan nga mga tinapok nga trapo nga adunay thinner ang mimugna og kalayo hinungdan sa dakong sunog.

Hinuon walay gikatahong naangol sa maong sunog ug gibanabana nga moabot sa P5 milyones ang danyos sa maong sunog gumikan sa mga bag-ong makinarya ug kahimanan nga gipundar sa maong pabrika.

Nadawat sa kabomberohan sa Lapu-Lapu ang alarma mga alas 10:15 sa milabay'ng gabii ug gipaubos sa 3rd alarm ug nakontrolar mga upat ka minutos human sila miresponde sa maong alarma. - Bong Soriano