Iranians sa Cebu 'monitor sa CPPO

Gimonitor sa kapolisan sa probinsiya sa Sugbo ang kalihukan sa mga Iranian nationals nga dunay negosyo ilabi na sa kalungsuran.

Kini nunot usab sa gipatuman nga mga lakang sa seguridad batok sa mga terorista.

Gawas sa mga Iranian nationals, gipamonitor usab ang ubang mga langyaw nga dunay mga negosyo aron pagseguro nga walay mga terorista nga makasulod sa Sugbo.

Gikabalak-an sa kapolisan nga dunay mga langyaw'ng terorista nga mosakay sa legal nga negosyo sa ilang isigka-ingon nga nia sa Sugbo aron molampus sa ilang mga dautang tinguha.

Gani ang mga pondok sa mga Muslim sa Sugbo ang unang nipasalig nga motabang sa pagbantay sa ilang mga sakop human unang gitumbok nga mga balik-Islam ang mga suspetsadong mga terorista nga napatay sa kapolisan sa dakbayan sa Sugbo.

Hinuon sa report sa kapolisan sa kalungsuran nga gipadangat sa Cebu Police Provincial Office, pipila kanila nipahibawo nga walay mga Iranian nationals ug uban pang langyaw'ng negosyante sa ilang lugar sama sa isla sa Camotes.

Sama sa pipila ka lungsod sa habagatang bahin sa probinsiya sa Sugbo, ila na usab gipatuman ang mga lakang sa seguridad batok sa mga terorista sama sa pagpakatap og unipormadong kapolisan sa mga lugar nga daghang tawo.

Lakip sa ilang gibantayan ang mga vital installations nga maoy target sa pagpamomba ug pagpangatake sa mga terorista.