2 ka polis sikop sa drug-bust

Duha ka batchmate nga polis nadakpan atol sa usa ka gihimong buy-bust operation sa Vice Control Section adtong Martes sa hapon, usa kanila nadestino sa San Nicolas Police Station ug ang usa nag-awol na sa Regional Mobile Group sa lungsod sa Sibonga.

Mga polis nga midakop sa duha nasurpresa nga ilang kauban sa trabaho ang mga drug pushers. Nakuha gikan kanila ang balor P450,000 nga gidudahang shabu.

Ang mga suspek nga gipresentar kagahapon ni Cebu City Police acting director, Supt. Melvin Gayotin giilang sila si PO1 Aldwin Vicada,31, residente sa Basak ning dakbayan ug kanhi PO1 John Rey Catiri nga residente sa dalan B. Rodriguez extension Sambag Dos ning dakbayan.

Si Sr. Insp. George Ylanan mibutyag nga sila si PO3 Vilma Abayan ug laing lalaking polis nga maoy mi-drive sa taxi maoy nakig-atubang kang Catiri diha sa atbang sa usa ka sikat nga fastfood restaurant diha sa Mambaling.

Sumala pang Ylanan nga niadto pang Hulyo 10 sila makadawat og impormasyon kabahin sa usa ka cellphone number nga diin mahimong makaorder og shabu maong ila kining gisuwayan.

Tuod man niadtong Martes sa alas 2 sa hapon misanong ang tag-iya sa numero, dihang nasuta nga tag P28,000 ra ang bulto (ang aktwal street value matag bulto sa shabu karon P45,000) miorder ang VCS ug napulo ka bulto ug diha sila mag-abot sa nahisgutang lugar.

Si Catiri maoy misulod sa taxi diin nagpaabot si PO3 Abayan ug ang back-up nga polis nga maoy nag-drive, giingong ulahi na kang Catiri nga nailhan si Abayan tungod kay nakasulod na kini sa taxi ug igo nalang kini nakaingon og "Oy ma'am!"

Matud pang Ylanan nga si PO1 Vicada kinsa diha ra sa unahan magbarog-barog daling miikyas dagan sa ilang balay sa Basak diin siya maabti ug nadakpan sa VCS ug mga kaubanan niini sa ilang police station nga miabag sa operasyon.

Nasuta nga ang numero sa cellphone nga gika-transaksyon sa VCS section iya sa cellphone ni Vicada, apan kini mihimakak sa pasangil kay matud pa niya nga iyang gipapaayo ang iyang cellphone ug ang iyang gisugo mao si Catiri ug wala siya'y kalambigitan nga gigamit kini sa naulahi sa transaksyon sa VCS.

Si Catiri sa iyang bahin mihimakak usab nga dunay kalambigitan sa maong drogas ug mibutyag nga igo lang siyang gisugo ni Vicada sa pagtunol niini diha sa maong taxi, matud niya wala siya makahibalong drogas ang sulod niini apan miangkong mag-agad lang siya sa porsiyentong itunol ni Vicada kaniya.

Si Catiri mi-awol niadto pang tuig 2001 gikan sa ilang kampo sa Sibonga, samtang si Vicada gihulagway ni Gayotin nga badlungon sa San Nicolas police station.

"Duna nay plano ang iyang hepe nga pailisan na na siya considering nga nagproblema na ang station chief sa iya (Vicada) apan wala ra ma-push through kay kulang ta sa tawo," asoy pang Gayotin.

Matud pang Gayotin nga angayang mahimo kining leksyon

Si Catiri ug Vicada batchmate niadtong misulod sila pagkapolis niadtong 1997, dunay laing duha ka mga batchmate sa duha nga nadestino usab sa CCPO ang nangadakpan na kaniadto sa mga entrapment operation sa National Bureau of Investigation ug ingon man sa VCS section gumikan usab sa pagpangilkil ug ubang binuang.

Ang labing ulahing ilang ka-batch matud pa ni Ylanan mao ang sakop sa Mandaue City Police Office nga si PO1 Richard Rosacena kinsa gidakop pipila na ka adlaw diha sulod sa usa ka giingong drug den sa Villagonzalo 2, Tejero ning dakbayan.