Pintor gipusil patay sa Mandaue

Namatay gayod ang usa ka pintor nga lalaki human kini mabiktima sa pagpamusil samtang nag-inom og beer human sa panihapon sa usa ka kan-anan niining gisudlan alas 8 pasado ang takna sa miaging gabii sa Sitio San Vicente, Tabok, siyudad sa Mandaue.

Ang biktima mao si Edcel Cazere, 30 anyos, ulitawo nga lumad nga taga Tangke, Central Uno, lungsod sa Bogo ug temporaryong nagpuyo sa maong dapit sa Mandaue.

Gipusil kini sa wala hiilhing tawo kinsa kalit lamang mitumaw sa maong dapit ug dali usab nga nakasibat pahilayo.

Nakabaton og duha ka samad pinusilan sa ulo ang biktima nga maoy nakaingon sa hinanaling kamatayon niini.

Si Po3 Edgar Pasaylo sa kapolisan sa Presinto 3 sa Basak Police Station nga gikahinabi sa Banat News miingon nga dali nilang gitumaN ang maong alarma apan nakasibat na ang mamumuno.

Matud pa ni Po3 Pasaylo nga si Cesar Domicelio nga maoy tag-iya sa restaurant nakabati sa duha ka buto sa armas. Nakita nalang nila nga nagbuy-od ang biktima nga naligo na sa kaugalingon niining dugo.