Lalaki patay sa kulata

Pagkaon gibayran og kinabuhi sa usa ka 42 anyos nga lalaki human kini giingong gikulata sa tag-iya sa usa ka karenderyang iyang gikan-an apan wala bayri diha sa Juana Osmeña extension, Purok 8 sa Camputhaw ning dakbayan niadtong Lunes sa gabii.

Ang biktima nga si Paterno Seno dela Peña miadto pa sa barangay hall aron magpa-blotter sa nahitabong pagpangulata kaniya sa suspek nga si Eduardo Nacilla Solon,50, molupyo usab sa maong lugar.

Sumala pa sa imbestigasyon nila ni SPO2 Rey Cuyos sa Homicide Section ang biktima mibugal-bugal sa suspek nianang pagka-alas tres sa hapon hinungdan nga gisukmag siya sa ulo ug kalawasan.

Apan nianang pagkagabii miadto si dela Peña sa barangay hall aron mosumbong sanglit duna na kini gipamati sa iyang lawas ug ulo human sa pagkulata.

Gikan didto nakigkita ang biktima uban sa mga tanod nga nakigkita sa iyang igsuon diha sa usa ka dakong department store diha sa north reclamation area ug nagpahatud sa Vicente Sotto Memorial Medical Center, apan pag-abot sa maong tambalanan gideklarar kining dead on arrival.

Si SPO1 Alfonso Flordelis kinsa maoy community cop nga nadestino sa maong barangay ug maoy midakop kang Solon mitug-an sa Banat News nga mikaon si dela Peña sa karenderya ni Solon.

Apan human mokaon milakaw kini og wala mobayad sa P17 nga pagkaon maong giapas kini sa suspek ug gikomprontase.

" Nikaon daw diha sa ilang karenderya, human og kaon milakaw wala bayari ang P17 maong giapas, unya kay gibugal-bugalan man lagi kuno siya kay gihagad man siya og sumbagay, nahinaykan tingali," asoy pang Flordelis.

Human mahibaw-ing nakabsan sa kinabuhi si dela Peña gidakop ni Flordelis uban sa mga tanod si Solon ug gitanggong na karon alang sa pagpasaka og kaso.