CICC matiwas sa dili pa ang Asean summit

Mahuman gayud sa dili pa ang Asean Summit karong Disyembre ang gitukod nga Cebu International Convention Center sa reclamation area sa dakbayan sa Mandaue.

Kini ang gipahibawo sa architect sa maong proyekto nga si Manuel Guanzon.

Gani sa progress report nga giduso ni Guanzon atol sa bag-ohay lang nga pagbisita ni Presidente Gloria Macapagal Arroyo sa Sugbo, 44 sa 186 na ka haligi sa CICC ang ilang napabarug ug gitakda nga mahuman kini sa 30 ka adlaw ug dili 45 ka adlaw.

Sayo niini nitumaw ang kabalaka nga dili mahuman ang CICC nunot sa kalangan sa pagpamalit sa mga materyales.

Apan si Gobernador Gwendolyn Garcia niingon nga ang New Government Procurement Act na ang ilang gamiton sa pagpamalit sa ubang kagamitan sama sa mga structural steel, elevator, escalator ug air conditioning unit aron maapas gyud sa tagal sa pagkahuman sa proyekto.

Gipasalig ni Garcia ngadto kang Arroyo nga mahuman na ang CICC sa Nobiyembre 15 nunot usab sa pahibawo ni Guanzon ngadto sa Presidente nga 42.03 porsyento na ang nahuman sa proyekto.

Hinoon si Arroyo nipadayag sa iyang pagsalig sa mga opisyal sa Sugbo nga mahuman gayud ang maong proyekto sa dili pa ang Asean Summit.

Gani sumala pa ni Arroyo nga sobra pa sa andam ang gipakita sa mga Sugbuanon sa umaabot Asean Summit ilabi na nga naila kini sa kamatinagdanon sa mga langyaw'ng turista.