Vendors gipadalhan notisya i-demolish

Gipadalhan na og notisya ang kapin sa usa ka libo ka mga sidewalk vendors sa dalan Colon, Osmeña boulevard ug Legaspi nga apil sa ma-apektuhan sa halapad nga demolisyon nga gimandung ipatuman ni Mayor Tomas Osmeña.

Kagahapong adlawa giduso na ni Gerry Marquez, consultant sa urban poor sa City Hall, ang notisya ngadto sa Squatters Prevention and Encroachment Elimination Division (SPEED) aron mao kini mo-serve sa notisya ngadto sa mga apektadong mga vendors.

Matud ni Eldy Concha, staff ni Marquez nga human madawat ang maong mga notisya ngadto sa mga apektadong mga vendors una pa mosugod pag-ihap ang 15 ka adlaw nga tagal nga gihatag sa mayor ngadto sa mga vendors aron boluntaryong mopahawa.

Gibanabanang mokapin sa 2,000 ang tanang mga vendors dinhi sa dakbayan nga apektado sa nag-ung-ong nga demolisyon.

Tinguha sa mayor nga malimpyo ang sidewalk dinhi sa dakbayan nunot niining nagsingabot nga Asean Summit sa Disyembre.

Ang ubang mga vendors nga apektado sa maong demolisyon nga wala pa mapadad-i og notisya naglakip sa mga sidewalk vendors nga nahimutang sa Salinas Driver sa Lahug, Gorordo Avenue, B. Rodriguez, N. Bacalso Avenue, Magallanes, P. Lopez, P. del Rosario,Panganiban ug Leon Kilat.

Subay kini sa rekomendasyon ni Citom Executive officer Arnel Tancinco nga maoy mirekomendar alang sa demolisyon ning maong mga vendors nga nakahatag og kahasol sa sidewalk nga naka-apektar usab sa trapiko sa dakbayan.