Babayeng 'dalaw' nakuhaa'g shabu

Babayeng mibisita sa iyang amigang priso diha sa Cebu City Police Office detention cell gikatahong nadakpang naghupot og shabu dihang girekisa sa jailer sa maong kampo niadtong Lunes sa gabii.

Ang suspek giilang si Fe Sanchez, hingkod ang panuigon ug molupyo sa Villagonzalo Dos, Tejero ning dakbayan kinsa mobisita unta kang Leah Montebon nga dinakpan usab tungod sa paghupot og drug paraphernalia.

Ang jailer nga si PO2 Joel Manalili kinsa maoy nagbantay niadtong higayuna mirekisa kang Sanchez isip pagsunod sa standard operating procedure nga kapkapan ang mga bisita sa mga bilanggo aron kalikayang makapalusot og mga iligal nga butang sa maong prisuhan.

Apan gikatahong diha sa usa sa mga kamot ni Sanchez samtang giisa kini nigimaw ang gamay'ng linukot nga tissue nga gitan-aw dayon sa maong polis.

Diha nakita ang duha ka paketeng may sulod nga gidudahang shabu ug duha ka aluminum foil hinungdan nga gidakop dayon kini.

Nagduda ang kapolisan nga ipalusot kini diha sa karsel ug posibleng dunay priso nga miorder niini o ba kaha ipang-"regalo" ngadto sa Bagong Buhay Rehabilitation Center.

Si Montebon kinsa maoy gibisitahan ni Sanchez gidakop sa mga sakop sa Criminal Investigation and Intelligence Branch niadtong Domingo sa gabii uban sa polis nga si PO1 Richard Rosacena nga sakop sa Mandaue City Police Office diha sa usa ka drug den sa Villagonzalo Dos sa Tejero.

Ang duha pulos nakuhaan og gamit sa pagpanuyop ug ingon man armas nga walay lisensya.