Mag-uuma gipusil

Usa ka mag-uuma gi-ulo pagpusil didto sa Santikan, bukirang barangay sa Danao sa milabay'ng gabii.

Ang biktima mao si Vicente Matugas Bueno, 48, lumad sa maong dapit ug usa ka mag-uuma.

Base sa taho ni Kapitan Perigrina Labador sa Santikan nga personal nga mitaho sa kapolisan sa dakbayan sa Danao nasayran nga ila na lang nakita sa dalan si Bueno nga wala nay kinabuhi ug adunay samad pinusilan sa iyang ulo ug tiyan gamit ang wala pa mailhing matang sa armas nga gigamit sa mamumuno.

Matud pa ni Labador nga usa ka maayong tawo ang biktima ug wala gyud siyay nakita nga motibo nga angayang patyon si Bueno. Gani, ang pamilya sa biktima mipadayag nga walay kontra sa maong dapit si Bueno.

Si SPO4 Jose Salingua sa Danao Police Station mipadayag nga ilang hatagan og tukmang imbestigasyon ang kamatayon ni Bueno bisan pa sa kalayo sa maong barangay gikan sa sentro sa dakbayan sa Danao.

Nasayran sa Banat News nga ang Santikan maoy gibarugan sa detachment sa 78th Infantry Batallion nga gisulong sa mga sakop sa mga rebeldeng New People's Army nga naglihok sa bukirang bahin sa Danao.

Usa sa anggulo nga susihon sa kapolisan sa Danao inabagan sa mga sakop sa militar nga naa madestino sa maong dapit ang kalambigitan sa mga rebelde.