Sikyu na-ulo sa armas, patay

Patay ang usa ka guwardiya nga nagduwaduwa sa iyang kalibre 38 nga armas sulod sa iyang lawak diha sa C. Mina Extension, Mabolo ning dakbayan niadtong Sabado sa hapon.

Ang biktima nga si Victoriano Mapalo Jr. 32, lumad nga taga Katig, Liloan, Leyte ug temporaryong nagpuyo sa maong dapit nakaangkon og usa ka samad pinusilan sa iyang ulo ug naabtan sa kapolisan nga nagbuy-od na diha sa iyang kwarto.

Base sa imbestigasyon ni SPO3 Zenaido Pastorfide sa Homicide Section ang kapuyo niining si Cherrie Plando, 28, mitug-an kanila nga hubog nga miabot ang biktima diha sa ilang balay nianang adlawa.

Dihang nisulod na kini sa ilang lawak gikuha niini ang iyang service revolver ug giduwa-duwaan apan kalit kining mibuto makausa ug diha-diha natumba ang biktima.

Pagsusi ni Plando kang Mapalo duna na kini samad diha sa ulo ug wala na maglihok hinungdan sa dali niyang pagtawag sa mga sakop sa Emergency Rescue Unit Foundation.

Sumala pa sa kapolisan ang ERUF volunteer nga si Jude Embrado misuway paghatag og first aid sa biktima apan wala na kini maulii ug nakabsan na gyud kini sa kinabuhi.

Si SPO1 Joseph Bucayan sa Scene of the Crime Section (SOCO) nakarekober og usa ka paltik nga kalibre 38 rebolber nga may usa ka basiyo ug tulo ka buhing bala niini diha sa tambor.

Walay nakitang kaguliyang diha sa sulod sa maong kwarto ang kapolisan nga timailhang dunay kagubot nga nahitabo sa sulod.