4 manuyopay nasikop

Upat ka suspetsadong manuyopay og shabu nasikop sa gipahigayong pagpangronda sa kapolisan sa Talisay kagahapon sa kaadlawon diha sa Tunga, Tanke.

Ang unang mga nasikop giila nga si Jessie Ababon, 40, ug Zoro Babel Navarro 34 pulos taga Tabunok.

Nasakmit ni PO1 Roy Sarsada, PO1 Renato Llanes Jr. ug PO1 Ronald Orizante gikan ni Ababon ang usa ka silver foil nga dunay sulod nga ginadiling drugas, usa ka cellphone ug motorsiklo nga nagtangag sa plakang GI-1276.

Si Navarro ug Ababon naaktohan sa kapolisan nga misulod sa usa ka payag-payag nga gikatahong suyopanan og shabu diha sa lugar.

Si Rodolfo Augis 40, taga Barangay Bulacao Pardo ug Michael Dela Peña, 39, residente sa Bulacao, Talisay ang sunod nga nasikop sa kapolisan.

Nasakmit gikan sa duha ang mga kahimanan nga gamiton sa pagsuyop og shabu.

Si Augis ug Dela Peña nasignit sa tulo ka nahisgutang polis dihang nag-pot session kini diha sulod sa usa ka abandonadong balay.