Fetus nakit-an sagol sa sagbutan

Usa ka fetus ang nakita-an sa kasagbutan sa usa ka batan-ong lalaki human kini mitubag sa sugo sa lawas niadong Sabado sa hapon ala 1:30 Sto. Niño, Bogo.

Si Joel dela Peña Mapait, 16, residente sa maong lugar maoy nakadiskubre sa fetus og daling mipahibawo ngadto sa kapolisan sa Bogo.

Segun sa asoy ni Mapait ngadto sa kapulisan samtang siya paingon sa may kasagbutan aron pagtubag sa sugo sa lawas, iyang nakit-an ang fetus diha sa iyang duol.

Gituohan sa kapolisan nga dili pa kini dugay nga gilabay o ba kaha gikuha gikan sa sabakan sa babaye kay matud pa lab-as pa kining nakit-an nga dihay daghang mga dugo nga naglimis sa fetus og wala pa usab kini manimaho.

Ang fetus daling gidala sa Bogo District Hospital aron ipailawom sa eksaminasyon.

Human sa paghiling sa mga doktor sa maong hospital, nasuta nga ang maong fetus mga tulo ngadto sa upat na ka bulan nga gisabak.

Si PO3 Hazel Jugasan sa Bogo sa Pakighinabi sa Banat News miingon nga nagpadayon pa karun ang ilang gihimong pakisusi sa mao nga dapit kon si kinsa ang naglabay sa fetus sa kasagbutan.