Bata gipusil sa Danao

Laing minor de edad na usab ang nabiktima sa pagpamusil kagahapon sa kaadlawon diha sa dakbayan sa Danao.

Kritikal ang kondisyon ni Jetwary Ligan, 16, residente Suba, Danao.

Si Ligan kinsa nakaangkon og samad pinusilan sa agtang ug daling gidala sa Danao District Hospital apan tungod sa kahimtang niini gibalhin sa usa ka tambalanan niining dakbayan.

Ang suspetsado giila lang sa ngalan nga "Salem" taga Bonifacio extention sa maong dakbayan kinsa daling miikyas human sa insidente.

Si SPO4 Teofilo Dequilmo desk officer sa kapolisan sa Danao nagkanayon sa pakighinabi niini sa Banat News kagahapon nga si Ligan uban sa iyang mga higala naglakaw diha sa dalan Duterte padulong mopaingon nga mopalit og pagkaon sa carenderia apan kalit nga gibabagan ni Salem ug sa walay pangutana gipusil sa suspetsado ang biktima.

Kahinumduman nga sa milabay'ng adlaw usa ka 16-anyos usab ang gipusil sa wala mailhing lalaki dihang naglakaw kini diha sa Guinocot, Danao.

Ang biktima giila nga si Gaudioso Jayme Bitoon Jr. kinsa nakaangkon og samad pinusilan sa iyang buko-buko diin ang bala milahos sa dughan og dali kining gidala sa Danao District Hospital apan gideklarar sa doktor nga patay na kining naabot sa tambalanan.

Si Dequilmo midungag nga wala pa nila mapiho ang motibo sa maong mga insidente ug padayon pa ang ilang imbestigasyon niini.