Utility crew sa mga kan-anan pasuoton og ID

Si Konsehal Gabriel Leyson sa Sugbo mipasar og ordinansa nga magbutang og mga silot batok sa mga kompaniya kinsa wala mopahigayon og estrikto nga implementasyon sa ilahang mga service crew nga magsul-ob og mga uniporme ug ID.

Si Leyson kinsa tsirman sa komitiba sa public works nagkanayon adunay mga insidente sa vandalism ug kawat ang nahitabo ug ang gidudahang suspetsado niini kadtong mga nagpaila nga mga service crew sa usa ka kompaniya nga wala magsul-ob og mga uniporme ug ID.

Ang maong ordinansa giaprobahan sa unang pagbasa sa konseho ug giduso kini sa committee on laws para sa dugang pagtuon ug rekomendasyon.

Ang section 1 sa ordinansa nagkanayon nga para mahunong ang insidente sa vandalism ug pagpangawat ang mga service crews sa mga kompaniya tugotan lang nga makapahigayon og serbisyo kung magsul-ob kini og proper uniform ug ID ug ang ilang service vehicle adunay pangalan ug logo sa kompaniya.

Ang section 4 sa maong ordinansa nagkanayon nga pamultahon og P2,000 sa unang kalapasan, P3,000 sa ika-duhang kalapasan ug P5,000 sa ikatulo ug ikanselar ang business permit sa mga utility company nga makalapas sa nahisgutang ordinansa.

Sa milabay'ng buwan, si Engineer Felicito Josol sa street lightning division mitaho nga sukad niadtong Marso adunay mga center island ug skywalk accessories ang gikawat.