Habol 'giduslitan' P800 mil 'ugdaw sa sunog sa 'lacion

Nagdilaab nga habol sa usa ka babaye nga nawad-an sa maayong pangisip ang miugdaw gayod og unom ka panimalay human masunog sa kalit nga pag-ulbo sa kalayo nga gibanabanang P800,000 ang danyos.

Nahitabo ang alarmang nadawat sa kabomberohan alas 3:40 ang takna sa hapon niadtong Biyernes sa Poblacion Occidental sa lungsod sa Consolacion.

Si FO2 Stephane Lada sa kabomberohan sa maong lungsod nga gikahinabi sa Banat News miingon nga ang sunog gipaubos sa general alarm ni Municipal Fire Marshall Melchor Lavoca.

Ug kini hingpit nakontrolar paglabay sa 5 minutos human usab sa ilang pagtinabangay sa kabomberohan sa dakbayan sa Mandaue, Liloan ug uban pa.

Matud pa ni FO2 Lada nga nagsugod ang kalayo sa lawak sa panimalay nga gipanag-iya ni Nestor Agbay human ang asawa niining si Josephine miduslit og pusporo sa habol nga maoy hinungdan sa pagdilaab.

Ginama sa light material ang maong panimalay ug dali lamang usab kaayong mikaylap sa mga silingan niini.

Ang mga panimalay nga naugdaw gipanag-iya nila ni Jesus Vidal, Serapion Alinsug, Leonado Casul, Alfredo Valle ug Prescila Valle nga partial lamang usab ang nasunog.