Inspection sa hotels: Kabahin gihapon sa ASEAN Summit security

Grupo sa mga kadagkuan sa kapolisan gikan sa Kampo Crame mitapos na kagahapon sa ilang inspeksyon sa tanang mga hotel, mga restaurants ug ubang mga venue nga posibleng adtoan sa mga lider ug delegadong manambong sa umaabot nga ASEAN Summit karong Disyembre.

Ang inspeksyon gihimo sa mga nagkadaiyang buhatan sa Crame alang sa pagtino kung unsa na kaandam ang Sugbo alang sa maong kalihukan, pinanguluhan ni Deputy Chief for Operations, Chief Supt. Isidro Lapeña kinsa maoy over-all task force commander sa maong kalihukan inubanan usab ni Chief Directorial Staff for Operations, Chief Supt. Antonio Billones.

Si Police Regional Office 7 director, Chief Supt. Silverio Alarcio sa pakighinabi sa Banat News sa telepono mibutyag nga gisusi sa inspecting team ang tanang aspeto sa seguridad, logistics, administrative ug operations.

Human sa ilang inspeksyon gipahigayon dayon ang komperensya diin gihisgutan ang mga problema, mga posibleng mahitabo ug kung unsay ilang angayang buhaton.

Lakip sa nakitang problema mao ang kakulang sa kabutangan sa mga polis nga mobantay sa maong kalihukan, dunay gibana-banang kapin 5,000 ka mga polis nga mangabot isip dugang sa seguridad.

Nagplano karon si Alarcio sa pagmuntar og mga tents sa palibot sa mga dapit diin dunay mga kalihukan sa ASEAN leaders lakip na sa palibot sa mga hotels nga ilang katulgan.

Ang mga hotel sa dakbayan sa Sugbu, Mandaue ug Lapu-Lapu maoy gisubay sa mga inspectors inubanan sa mga lokal nga kapolisan .

Ang matag special units sa PNP girepresentahan sa maong grupo aron matino ang tanang aspeto sa seguridad ug mga gikinahanglang mga kurihian.

Karong bulana gipaabot nga mangabot ang tanang mga gikinahanglang mga logistics ug dugang mga polis gikan sa ubang rehiyon aron idugang sa pwersa karon sa PRO7.