Naglakaw lang daplin sa dalan nga paingon na pauli sa ilang panimalay sa nahisgutang lugar ang biktimang si Floro Luste Gerali, 45, ulitawo.
Si Gerali sa dihang paingon na molabang sa karsada ang gisundan sa tulo ka wala mailhing tawo dayon gipusil sa makadaghang higayon sa nagkadaiyang parte sa kalawasan nga miresulta sa pagkamatay dihadiha.
Ang miresponding kapolisan sa Balamban nakakuhag pito ka kabhang sa .45 pistol, usa ka kabhang sa 9mm ug tulo ka buhing bala.
Base sa pamahayag sa mga residente sa maong lugar nga ilang nakita nga gasunod ang tulo ka mga tawo sa biktima ug kalit kining gipusil.
Apan tungod sa kangitngit sa maong lugar walay nakaila sa mga suspetsado.
Human sa pagpamusil ang tulo yanong misibat palayo sa lugar.
Si PO2 Cesar Climaco sa Balamban sa pakighinabi sa Banat News, mihulagway ni Gerali nga dakong drug pusher sa ilang lungsod.
Gitawag nga "number one big time drug pusher" si Gerali nga naglihok sa Balamban matud ni Climaco.
Ang kapolisan padayon pa sa ilang gihimong imbestigasyon kon si kinsa ang nipusil patay sa biktima.