Mandaue drivers lahos una sa Jones-Pogado

Dili pa makapasalig ang mga drayber sa Mandaue-Jones nga rota nga dili una sila molahos sa pagpamasahero sa Osmeña Boulevard sugod karung Lunes samtang dili pa hingpit nga kaaprobahan ug mapatuman ang compromised ordinance nga nagtugot sa ubang mga sakyanan nga makalahos sa pagpamasahero sa kinapusoran sa siyudad sa Sugbo.

Gibutyag sa presidente sa Nagkahiusang Drayber sa Sugbo (NADSU) Tony Pogado nga iya pang pakigtagbuan ang mga drayber kabahin niini tungod kay nabalaka siya nga maglisud nga makapaabot sa maong gidugayon ang maong mga drayber gumikan kay ang pagpamasahero mao ra usab ang ilang gisaligan.

Hinuon bugtong gipasalig ni Pogado mao ang iyang pagpatawag og meeting tali sa mga drayber aron pasabton sa maong kalambuan.

Nasayran nga dili pa ikapatuman ang pagtugot sa mga drayber sa Mandaue-Jones nga rota nga makalahos sa pagpamasahero sa Osmeña Boulevard sugod sa Lunes human gisalikway sa Citom board ang desisyon ni Osmeña nga suspensohon bali og 90 ka adlaw ang City Ordinance 1837 nga nag-ban sa mga PUJ sa Mandaue.

Gipaboran sa Citom ang ordinansahon ni Konsehal Jocelyn Pesquera nga nagrekomendar nga bahinon ang rota sa kapin sa 400 ka mga PUJ sa Mandaue-Jones nga rota diin ang katunga na lang niini ang tugotang makalahos sa Osmeña Boulevard samtang ang laing 200 adto na mokarga ug diskarga sa pasahero sa Ayala Terminal.

Karon pang Miyerkules ipahigayon ang final deliberation sa maong ordinansa ug human unya kini kaaprobahi ipahigayon ang pagpublikar niini sa mga lokal nga pamantalaan ug human sa 15 ka adlaw una pa hingpit ikapatuman.