'Pamolitika' ra kang Tom pagduot sa kap sa Pardo

"Pamolitika," mao kiniy reaksyon ni Poblacion Pardo Barangay Captain Danilo Lim sa mga giluwatang pamahayag ni Mayor Tomas Osmeña nga namasangil ngadto kaniya nga protektor sa pagkatap sa video karera machine diha sa ilang barangay.

Gihulagway ni Lim ang maong mga pamasangil nga walay igong basihanan nga gitumong lang aron dauton ang iyang kridibilidad.

Labaw nang dili motuo si Lim nga ang iyang mga konsehal sa barangay maoy nagsulti niini ngadto sa mayor.

Hinuon giangkon ni Lim nga tinuoray nga nakigtagbo sa buhatan ni Osmeña ang iyang lima ka mga konsehal pinangulohan ni kagawad Fermin Dasmariñas niadtong miaging adlaw.

Apan giklaro sa kapitan nga napugos lang ang mao niyang mga konsehal gumikan sa pagsige og kombinsir ni kanhi Konsehal George Rama.

Gitug-an sa kapitan nga tinuoray nga misiaw ang video karera sa Sityo Tabucanal sakop sa iyang barangay nga maoy lugar nga gipuy-an sa iyang konsehal nga si Dasmariñas.

Matud ni Lim nga si Dasmarinas mao kini tsirman sa committee on peace and order apan wala kini nahimo pagsumpo sa video karera hinungdan nga mi-resign sa pagka-tsirman sa komitiba.

Gitug-an usab ni Lim nga nabulilyaso ang nagpadayong operasyon sa video karera sa Sityo Tabucanal human masakpi ang ilang kanhi tanod nga si Jimmy Tabora nga maoy midawat sa mga suborno sa video karera operator nga alang unta niya ug kang Dasmarinas.

Matud ni Lim nga didto pa nila nahibaw-i nga gigahinan siya og P2 mil ug P1,500 kang Dasmariñas nga maoy tsirman sa peace and order sa ilang barangay. Gani matud ni Lim ang mga konsehal pa niya maoy nag-imbistigar sa napalagpot nilang tanod.

Nasayran nga si Lim naila na kining dumadapig sa kampo ni kanhi Mayor Alvin Garcia nga karibal sa politika sa BOPK ug gani si Lim mao usab kini gihugonhugon nga nagpaluyo sa kandidatura ni kanhi Cebu City Sports Commissioner Jonathan Guardo nga gitakdang moatbang kang Kongresista Antonio Cuenco sa piniliay sunod tuig.