M-cab driver gipusil patay

Namatay gyod ang usa ka multicab driver kinsa kalit lang gipusil sa duha ka wala mailhing lalaki nga giingong mga pasahero usab niini niadtong miaging gabii sa Looc, Lapu-Lapu.

Si Felix Petorial Miano, 34 anyos, nga taga Buagsong, Codova napalgan sa mga sakop sa SWAT nga nagkadugo na diha sa iyang manobela.

Si PO3 Manolito Abellanosa sa Homicide Section sa kapolisan sa maong dakbayan ug ang mga sakop sa Special Weapon and Tactics (SWAT) dali nga nakatubag sa maong alarma.

Si PO1 Jurvey Timagos sa Homicide Section sa kapolisan sa maong dakbayan nga gikahinabi sa Banat News miingon nga ang usa sa suspetsado naglingkod sa front seat ug ang kauban sa luyo sa biktima.

Sa gihimong imbestigasyon ni PO3 Abellanosa miingon nga duha ka igo sa ulo ang naangkon sa biktima ug uban pang bahin sa kalawasan niini.