Nanunggab sa tawong nangasaba sa kan-anan

Gidunggab sa usa ka batan-ong lalaki ang usa ka tawo kinsa mikasaba kaniya sa sulod sa kan-anan nga iyang gitrabahoan.

Ang pagpanunggab nahitabo alas 11 pasado ang takna sa buntag sa dalan S. Osmeña, Poblacion, Gun-ob, siyudad sa Lapu-Lapu.

Ang nadunggaban mao si Rafael Amores, 51, ug ang suspetsado mao si Cyrel Dungog, 22, ulitawo nga pulos nagpuyo sa maong dapit.

Sa imbestigasyon nga gihimo nila ni SPO2 Rolito Jumao-as ug PO1 Marcelo Inso sa Homicide Section sa kapolisan nga gikasab-an sa biktima ang suspetsado.

Ang suspetsado kinsa nanglimpiyo sa mga lamesa nga gikan-an sa mga kustomer mipunit og barbecue stick ug gihansak sa dughan sa biktima.

Dali nga misibat ang suspetsado pahilayo ug ang biktima dali usab nga gidala sa Opon District Hospital sa Carajay, Gun-ob, Lapu-Lapu.

Si PO1 Inso nga gikahinabi sa Banat News miingon nga boluntaryo nga mitahan ang suspetsado ngadto sa ilang buhatan sa paglabay sa pipila ka oras ug gitanggong kini sa sulod sa bilanggoan.