3 paketeng shabu, kutsilyo 'sakmit sa 3 lalaki

Nasakmitan og tulo ka dagkong pakete sa shabu ug kutsilyo ang tulo ka mga lalaki nga nadakpan atol sa entrapment operation sa kapolisan human usab sa ilang pagbiktima sa usa ka mabdos nga babaye.

Gihimo ang entrapment operation sa kapolisan sa sulod sa department store sa Lapu-Lapu alas 3 pasado ang takna sa hapon niadtong Miyerkules.

Ang nadakpan mao sila si Adonis Avelino, 37, taga Looc, Danao, Michael Oliverio ug Michael Peralta, 27, taga Dawin Carmen, Cebu.

Si PO2 Christian Torres nga gikahinabi sa Banat News miila sa biktima nga mao si Marites Anam, 28, minyo nga taga Poblacion sa maong dakbayan.

Sumala pa ni PO2 Torres nga naglakaw si Anam paingon sa maternity sa Poblacion alang sa pagpa-prenatal.

Gisugat kini sa tulo ka suspetsado nga nagpailang ahente sa tambal ug gitanyagan og numero sa masiao nga siguradong modaug sa katindad nga P3,000.

Nadani si Anam ug human ikahatag ang P3,000 ang mga suspetsado nangayo pa gayod sa ngalan ug address niini.

Dugang pa ni P02 Torres nga dihang nahiuli na si Anam sa ilang panimalay ang mga suspetsado nanawag sa telepono ug mipahibalo nga sold out na ang numero nga ilang gikahatag niini.

Gitanyagan na usab sa mga suspetsado ang biktima og laing kombinasyon sa numero apan nagkantidad na lang og P890.

Nakamatikod ang biktima nga giilad sa mga suspetsado maoy hinungdan nga mitaho kini ngadto sa ilang buhatan human sa pagdawat sa gitanyag ug gisabot nga makigkita sa department store sa Mactan.

Sumala pa ni Po2 Torres nga sa akto gayod nga pagtunol sa kuwarta ug papel nga gisulatan sa numero sa masiao ilang nadakpan ang mga suspetsado ug sa pagrikisa nakuhaan usab og shabu ug kutsilyo.