Halapad nga demolisyon sa mga vendors ipatuman

Daghang mga vendors dinhi sa dakbayan apektado sa halapad nga demolisyon nga girekomendar sa Citom tungod kay nakahatag kini og kahasol sa trapiko ilabi na sa sidewalk nga maoy agi-anan sa publiko.

Ang Citom maoy mibarog nga reklamante batok niining mga vendors nga anaa karon mag-okupar sa mga sidewalk dinhi sa dakbayan ug mirekomendar ngadto kang Mayor Tomas Osmeña nga ipatuman ang demolisyon.

Atol sa press conference kagahapon sa udto gipahibalo ni Osmeña nga iyang gihatagan og duha ka semana ang maong mga vendors dinhi sa dakbayan nga nakahasol sa agianan sa publiko nga moboluntaryong mopahawa sa lugar nga ilang gi-okupahan.

Sentro sa gihulagway sa mayor mao ang mga sidewalk vendors gikan sa Aderan Hotel sa Lahug lahos na sa Capitol,Osmeña Boulevard paingon sa Colon area.

Matud sa mayor human sa maong duha ka semana nga tagal momando siya og mga inspektor nga mosusi ning maong mga lugar ug kadtong mga vendors nga nagpabiling nagmagahi pag-estar sa maong dapit iyang ipa-demolish.

Giklaro sa mayor nga wala siyay ihatag nga relocation site ning maong mga vendors. - Darrel A. Carumba German grenade kit-an Ni Bong Soriano

Naundang makadiyot ang klase sa Ibo Elementary School sa Lapu-lapu human usa ka MK2 nga German grenade nakit-an atubangan sa maong tunghaan kagahapon sa hapon.

Base sa imbestigasyon ni PO3 Jacinto Mandal Jr. sakop sa SWAT team sa kapolisan sa dakbayan sa Lapu-Lapu, usa ka Cilito Noval nga barangay tanod sa Ibo, Lapu-Lapu mitaho mga 1:20 kagahapon sa hapon ngadto sa kapolisan sa Lapu-Lapu nga nagkanayong adunay granada nga nakit-an gawas sa tunghaan sa Ibo Elementary School.

Atol sa pagresponde sa mga sakop sa SWAT ang maong granada usa ka MK2 grenade nga maoy gigamit sa mga German Infantry atol sa ikaduhang gubat sa kalibutan.

Sumala pa nga gituhoang gituyo sa pagbutang sa wala pa mailhing responsable aron mabulabog ang pagtungha sa mga bata sa naasoy'ng tunghaan.

Matud pa ni PO3 Mandal human nila gihimo ang paghikling sa kabataan sa maong tunghaan aron ilang pabuthon ang maong granada, nasuta hinuon nga wala na kini "TNT content" ug wala nay detonator hinungdan nga yano nila kining gipunit ug gidala sa ilang buhatan.

Gumikan sa kalisang ug kabalaka sa mga ginikanan, giguba nila ang koral sa likod nga bahin sa maong tunghaan aron kini maoy magsilbing dapit kaagian sa ilang pagpanggawas sa maong tunghaan.

Hinuon, walay gikatahong nasamdan o naangol sa mga tinun-an sa maong dapit atol sa maong insidente.