Bomba mibuto atubangan sa grahian

Usa ka bomba nga gituhoang gituyo pagplanta sa gawas nga bahin sa grahian sa HR Taxi sa Pajo, Lapu-Lapu mibuto sa milabay'ng gabii.

Sa imbestigasyon sa Lapu-Lapu City Police Office, nasayran nga usa ka Gerald Gadiana nga residente sa Bucana, Pajo, Lapu-Lapu mitaho sa kapolisan sa maong dakbayan human nakabati siya og kusog kaayong buto sa gawas sa ilang panimalay nga nahimutang duol sa grahian sa HR Taxi nga gipanag-iya ni Hilario Ramirez.

Apan si Gadiana nagkanayon nga wala siya makakita kun kinsa ang nagbutang og bomba duol sa ilang panimalay.

Atol sa pagresponde sa mga sakop SWAT team sa Lapu-Lapu City Police Office pinangulohan ni PO3 Rolan Melior, nasuta nga usa ka 100 milliliter nga sudlanan sa clorox nga gibutangan og pulbora sa pabuto ug gituyo sa pagpabuto atubangan sa grahian sa HR Taxi.

Matud pa ni PO3 Melior gibutangan og pulbora sa firecrackers ang maong sudlanan ug gibutangan og pabilo aron sipa kaayo ang pagbusikad niini.

Hinuon atol sa maong insidente, walay gikatahong naangol ug walay kabtangan sa HR Taxi nga naapektuhan.

Gani, ikaduha na kini nga nahitabo sa maong barangay diin ang una niini didto gipabuto sa pultahan sa Pajo Elementary School pipila ka bulan ang nakalabay ning tuiga.

Padayon pa gihapon ang pag-imbestigar sa kapolisan sa maong insidente alang sa pag-ila sa responsable sa maong pagpanglawgaw ug hulga sa katulugon sa mga residente sa maong dapit.