Firetrucks sa fire dept ipatan-aw

Gimanduan ni Mayor Tomas Osmeña si Cebu City Fire Marshal Supt. Esmael Codilla sa pag-atiman og susi sa kondisyon sa tanang mga firetrucks sa Cebu City Fire Department aron maayo ang tanang mga ginagmay'ng guba niini ug aron dili na masubli ang panghitabo niadtong miaging adlaw.

Atol sa press conference kagahapon sa udto daw wala mahimuot si Osmeña dihang nahibaw-an niini nga aksidenting nakabangga og pito ka mga sakyanan ang firetruck nga gimaneho ni SFO1 Flor Soco Jr. diha sa dalan M.J. Cuenco corner T. Padilla niadtong milabay'ng adlaw.

Dili madawat nga rason sa mayor nga ang problema sa brake niini maoy hinungdan sa maong aksidente tungod kay sa matag higayon nga dunay request ang fire department alang sa pagpaayo sa mga firetrucks niini dili gyud niya kini balibaran.

Ipahiling sa mayor ang tanang mga firetrucks sa Cebu City Fire Department aron mahibaw-an ang tinuoray'ng kondisyon niini ug mga ginagmay'ng depekto.

Gipasalig sa mayor nga tabangan sa siyudad ang mga nabiktima nga nalandig sa tambalanan gawas lang niadtong mga biktima nga nadala sa Perpetual Soccour Hospital.

Ang sagad sa 12 ka mga biktima gidala sa Cebu City Medical Center (CCMC) samtang ang uban gidala sa Perpetual Soccour.