Dutch gipusil sa 'boring'

Usa ka Dutch national ang gipusil sa usa ka boring sayo kagahapon sa buntag sa lungsod sa Consolacion.

Ang biktima nailhan nga usa ka Chris Vonk, kasamtangang nagpuyo sa giabangan nga panimaye nga gipanag-iya sa usa ka Romeo Flores sa barangay Cansaga, lungsod sa Consolacion.

Usa ka tawag sa telepono ang nadawat sa kapolisan sa lungsod sa Consolacion nga nagpahibawo labot sa maong alarma alas 6:55 sa buntag kagahapon.

Daling niresponde ang grupo ni SPO2 Pedrito Cabornay ug kaubanan sa lugar apan nakasibat na ang babaye nga giingong boring nga nipusil sa biktima.

Si Vonk ang daling gidala sa ambulansiya sa lungsod sa Consolacion padulong sa Cebu Doctor's Hospital human nakaangkon og samad pinusilan ang biktima sa iyang liog ug agtang.

Nakuha sa kapolisan ang armas nga snub nose revolver nga gigamit sa babaye sa pagpusil gawas sa panimaye ug gitouhang gilabay human sa insidenti ug dayun sibat palayo sa lugar.

Walay mga saksi sa lugar nga nakasulti ngadto sa kapolisan sa hinungdan sa pagpamusil ingon man wala usab mailhi ang babaye nga giingong pick-up girl.

Alas 5 kagahapon sa hapon, ang chief investigator sa kapolisan sa lungsod sa Consolacion nga si SPO3 Joseph Yongco, nipahibawo nga anaa sa luwas nga kahimtang ang biktima human naoperahan ang iyang samad ug nakuha na ang nag-ungot nga bala sa pusil.

Matud pa ni Yongco nga ang biktima mao ra gyud ang ilang gilauman nga makasulti sa hinungdan kon nganong nahitabo ang pagpamusil ngadto kaniya.