Namisita giluba

Usa ka ulitawo nga namisita sa iyang hinigugmang babaye gidunggab sa iyang karibal sa San Roque, Lower Matumbo, Pusok, Lapu-Lapu kagahapon sa kaadlawon.

Si Junerick Rago, 23, nga nagpuyo sa maong dapit gidunggab sa laing ulitawong nanguyab sa iyang hinigugma nga nailhan sa ngalang Ronald Medino, 27, silingan ra usab sa biktima.

Sa imbestigasyon nga gihimo ni PO3 Manolito Abellanosa sa Homicide Section sa dakbayan sa Lapu-Lapu nasayran nga si Rago namisita sa iyang uyab nga si "Neth" sa maong dapit mga alas 12 kagahapon sa kaadlawon.

Sa dihang mihigda si Rago sa paa sa iyang uyab, si Medino nga nagpaniid kalit kining mibutho. Nagkalalis silang Rago ug Medino hangtod misangko sa pagpanunggab.

Si Rago nga samaran sa iyang tiyan gidali pagdala sa Lapu-Lapu District hospital ug gibalhin sa Vicente Sotto Memorial Medical Center diin anaa kini sa kritikal nga kondisyon atol ning pagbalita.

Si Medino buot untang mosibat apan nasikop kini gumikan sa gihimong hot pursuit operation sa kapolisan sa Lapu-Lapu.