Diskwento's multa sa PUJ driver ok na

Giaprobahan ni Mayor Tomas Osmeña ang paghatag og 50 ngadto sa 90 porsyento nga diskwento sa bayranan nga multa sa pending violations sa mga drayber sa Puj nga namasahero dinhi sa dakbayan sa Sugbo.

Mao kini tubag sa mayor kabahin sa awhag sa presidente sa Nagkahiusang Drayber sa Sugbo (NADSU) Tony Pogado nga mihangyo nga mahatagan sila og 50 porsyento nga diskwento sa ilang bayranan nga multa gikan sa mga pending violations.

Apan giklaro sa mayor nga case-to-case basis ang iyang paghatag og diskwento sa maong mga drayber ug usa sa iyang basihan niini mao kadtong dili kaayo dagko og multahan og wala kaayo magsapawsapaw ang mga violations nga nahimo sa lagda sa trapiko.

Usa sa gihimong basehanan sa mayor nga dili niya mahimong mahatagan og diskwento mao kadtong mga drayber nga nagsapawsapaw ang traffic violations nga miabot na kini ngadto sa P300 ngadto sa P400 mil nga nagpasabot na kini nga usa ka badlongon ang maong drayber ug dili angay'ng tugutan nga makapadayon pagpamasahero dinhi sa dakbayan.

Giklaro sa mayor nga sagad 50 porsyento ang diskwento sa multahan sa pending violations ang iyang gihatag ngadto sa mga drayber og 90 porsyento ang diskwento kun ang maong drayber rehistradong botante dinhi sa siyudad sa Sugbo.

Sigun sa nahipos nga kasayuran sa mayor nga labaw sa katunga sa mga drayber dinhi sa dakbayan dili rehistradong botante dinhi sa siyudad nga dili kaayo ganahang tabangan sa mayor gumikan kay wala usab kini magpakabana sa ilang social responsibility.