Pagsuspenso sa CO 1837 uyonan pa sa konseho

Giangkon ni Mayor Tomas Osmeña nga dili gyud mahimong ikapatuman ang iyang desisyon pagsuspenso bali og 90 ka adlaw sa implementasyon sa City Ordinance 1837 nga nag-ban sa mga intra-city PUJ pagsulod dinhi sa dakbayan sa Sugbo sugod karung Lunes kun dili kini aprobahan sa konseho sa dakbayan sa Sugbo.

Kini tungod kay matud sa mayor gipasabot siya sa iyang mga abogado nga dili mahimong masuspenso ang usa ka ordinansa sa siyudad kun walay resolusyon alang niini nga aprobahan sa konseho.

Giklaro ni Osmeña nga bugtong ang mga PUJ sa Mandaue Jones nga rota mao lang ang iyang gitugotan nga makapadayon sa pagpamasahero lahos sa Osmeña Boulevard ug kinapusoran sa dakbayan ug walay labot niini ang ubang mga PUJ gawas sa siyudad sa Sugbo.

Ang Citom mipadayon gihapon sa ilang pagpanakop sa mga PUJ unit sa Mandaue nga molahos sa Osmeña Boulevard gumikan kay wala pa silay nadawat nga opisyal nga kamanduan nga magsuspenso sa pagpatuman sa maong ordinansa.

Gani, matud ni Citom Executive Officer Arnel Tancingco nga gikabalak-an nila kun mapatuman ang 90 ka adlaw nga pagsuspenso mao ang posibleng pagsulod na usab dinhi sa dakbayan sa mga PUJ sa Talisay ug Tabunok nga anaa na karon mokarga ug diskarga sa ilang mga pasahero sa Citilink terminal.

Kumbinsido si Osmeña nga suportahan ang mao niyang lakang sa konseho ilabi na kay ang pagrespeto niya kang Gobernador Gwendolyn Garcia maoy hinungdan nga misugot siya nga masuspenso ang pagpatuman sa maong ordinansa.