Lawas naigo sa dinamita mibuto

Mibuto ang kalawasan ug nanggawas ang daghang dugo sa dunggan sa usa ka lalaki human kini mabuthi sa dinamita sa miaging buntag diha sa kadagatan sa Isla sa Digato ug Paji, Bantayan.

Nasayran sa kapolisan sa Bantayan nga duha ka pumpboat ang nanagat sa Digato ug Paji nga pulos dunay dalang mga dinamita sa ilang pagpanagat.

Apan walay swerte si Alexander Mata, 36, minyo, nagpuyo sa Sitio Tagasa, Maya Daanbantayan kay namatay human mabuthi og dinamita didto sa ilawom sa dagat.

Si Mata ug laing usa pa niini ka kauban misawom ilawom sa dagat aron pagsusi sa nagpunsisok nga isda.

Ang kauban ni Mata giingong mikawas na sa ibabaw ug siya na lang usa sa ilawom. Nagtuo ang kauban ni Mata sa pikas pumpboat nga diha na kini sa ibabaw mao nga nagduslit kini og dinamita aron ilabay sa gitapokan sa isda.

Matud pa sa kapolisan nga dihay usa ka kauban, misinggit sa pag-ingon nga "anaa pa si Alexander sa ilawom", apan ulahi na kay nalabay na sa dagat ang dinamita.

Si PO2 Mamerto Gastador sa Bantayan miingon nga ang tagtungod sa biktima wala sultii sa tinuod og igo lang sila giingnan nga 'nalumos' sa dagat ang biktima.

Matud ni PO2 Gastador nga ilang gisusi sa Bantayan District Hospital ug nasayran nga nabuthan gyud sa dinamita ang bikitma.