Firetruck midaro sa mga sakyanan

Gibana-banang 20 ka mga tawo ang nangaangol human gidaro sa usa ka trak sa bombero ang pito ka mga sakyanan diha sa dalan M.J. Cuenco Barangay T. Padilla ning dakbayan kagahapon sa buntag.

Ang trak sa Bureau of Fire Protection sa Lahug Sub station nga gimaneho ni SFO1 Floro Soco midasmag sa mga PUJ dihang giingong kalit nga nibasiyo ang brake niini.

Ang maong trak gikan sa Lahug ug padulong sa Cebu City hall dihang sa pag-abot diha sa crossing kalit wala na kini makahunong gumikan sa pagkabasiyo sa brake niini.

Didto kini napunta sa mga sakyanang pasaheruan ug pribado diha sa nahisgutang dapit nga nagdagan ug ang uban nag-urong pa.

Sumala pa ni traffic enforcer Wenefredo dela Victoria nga ang mga sakyanan nila ni Alan Mariblanca, Jovan Benitez, Francisco Veloso, Richard Gibson, Alex Tan Areglo,Romeo Buain maoy nadaro sa firetruck nga may plakang SEY 173.

Ang onse ka samarong mga pasahero daling gidala sa Cebu City Medical Center apan gituuhang mas daghan pa ang nangaangol nga tua magpadala sa mga pribadong tambalanan.

Gipanghimakak ni Floro nga paspas ang dagan sa iyang trak, matud pa niya nga maong kusog ang impact diha sa mga sakyanan gumikan kini sa kabug-at sa kargang tubig sa iyang trak.

Si Cebu City Fire Marshal Ismael Codilla mitug-an sa mga tigbalita nga sagubangon sa ilang buhatan ang danyos ug tulubagon sa ospital sa mga samaron gumikan kay usa ka aksidente ang nahitabo.

Nasuta sa report sa TV Patrol Central Visayas nga wala marehistro ang maong fire truck sa Land Transportation Office 7, si Codilla sa iyang bahin nagkanayon nga sagad sa ilang mga trak gidonar lang gikan sa ubang nasud ug walay mga kumpletong dokumentos nga mahatag sa pagparehistro niini.

Bugtong ang ilang rehiyonal nga buhatan ra maoy mohikay niini.