Usa patay sa nabalitok nga motor

Dead on the spot ang usa ka lalaki ug laing usa anaa sa 50-50 ang kahimtang sulod sa tambalanan human ang ilang gisakyang motorsiklo nibuto ang pangunahang ligid kagahapon sa buntag alas 10:30 ang takna sa Barangay Aguho National Road Daan Bantayan Sugbo.

Ang namatay mao si Crisdy Arrabis nga nag-angkas sa motorsiklo uban ni Alberto Casinillo 19, ulitawo.

Samtang ang drayber sa kawasaki nga motorsiklo nga giila sa kapulisan mao si Edmer Eturma, 17, ulitawo, ang tulo pulos nanimuyo sa Barangay Tapilon Daan Bantayan.

Si Eturma anaa sa 50-50 ang kahimtang og gidali pagdala sa Don Vicente Sotto Memorial Medical Center dinhi sa dakbayan sa Sugbo.

Si PO3 Dennis Velez sa Bantayan Police Station sa pakighinabi sa Banat News nagkanayon nga gikan ang tulo sa Poblacion sakay sa motor nga gimaneho ni Eturma.

Paghidangat sa maong lugar sa kalit lang nibuto ang pangunahang ligid ug nawad-an sa kontrol ang drayber hinungdan nga nangalamba sila sa sementadong dalan ug nangalagpot.