Tinigbasay, duha angol

Gumikan lang sa usa ka baldeng tubig usa ka babaye ug lalaki ang naglalis nga misangpot sa tinigbasay diha sa Lower Taptap, Taptap ning dakbayan sa Sugbo niadtong Domingo sa hapon.

Ang duha giilang sila si Rosana Yoti, 39, ug Alberto Gualesa ,38, residente sa samang lugar.

Base sa imbestigasyon ni SPO3 Zenaido Pastorfide sa Homicide Section nga naglalis ang duha kabahin sa usa ka baldeng tubig nga gikawos ni Yoti diha sa tubod sa tubig sulod sa umahan ni Gualesa.

Si Gualesa giingong igo lang nangutana kung napuno ba ang balde ni Yoti apan giingong imbes nga motubag sa pangutana ang babaye giingong kalit kining mipunit og bato ug gilabay si Gualesa.

Dugang pa niini gikatahong mikuha sa iyang pitik ang babaye ug gitirador si Gualesa makadaghang higayon ug wala matagbaw daling mikuha sa iyang sanggot ug gitigbas sa buko-buko ang lalaki duha ka higayon.

Si Gualesa kinsa bisan samaron nailog ang sanggot gikan sa suspek ug giunay kini og sanggot sa liog ni Yoti hinungdan sa ilang pagkaangol.

Nianang tungura ang igsuon ni Yoti nga si Marianita kinsa miapas sa tubod maoy nakapakgang kang Gualesa sa pagsanggot pag-usab ngadto sa iyang igsuon.

Ang duha parehong nalandig sa Cebu City Medical Center ug kasamtangan pang gihikay sa kapolisan kung unsay hinungdan sa pagpamitik ug pagpanglabay sa babaye ngadto kang Gualesa.