SRU training gisugdan 'gahapon

Pormal na nga gipahigayon kagahapon ang pagbansay sa grupo sa Special Reaction Unit (SRU) o mga elite gruop sa kapolisan diha sa Training Center sa Barangay Apas, Lahug niining dakbayan.

Ang maong training maluntad sa 45 ka adlaw. Ang SRU gilangkuban sa 58 ka polis nga naggikan sa Regional Mobile Group (RMG).

Si Police Provincial Director Vicente Loot mibutyag nga ang SRU usa ka high breed unit nga maka-operate sa urban condition ug jungle warfare.

Ang maong mga polis mga bag-ong recruits kinsa miagi una sa koti nga proseso sa paghashas ug physical fitness test.

Si Loot mipasalig nga ang mga polis nga nasakop sa SRU mga maayo tungod kay mga hinashasan og lahi ang ilang training apan tungod kay tawo lang may posibilidad usab nga masayop apan ang matag sayop nila adunay tugbang silot ug bisan pa nga mga elite unit ang maong grupo dili sila exempted sa mga silot.

Ang training staff sa grupo mao ang Special Action Force (SAF) nga naggikan sa Camp Crame ug ang mga ekipo ug logistics naggikan sa kagamhanan sa probinsiya.

Si Gobernador Gwendolyn Garcia nanghinaot nga ang grupo sa SRU kanunay'ng andam sa mga emerhensiya para mamentenar ang kahapsay ug kalinaw sa probinsiya sa Sugbo.

"Just I declared total all out war against the communist terrorist, I am also prepared as I declared now total all out support to our police forces and the military" matud ni Garcia.