'All-out-war' di molampos-Dakay

Walay pagtuo ang simbahan nga mosaler kining laraw sa gobyerno sa pakiggubat batok sa mga rebelde.

Matud pa ni Msgr. Achiles Dakay, tigpamaba sa Artdayoses sa Sugbo nga may katahap siya nga panguwarta lamang kini sa mga dagkong opisyal sa mga sundawo.

Gani matud pa niya nga mopabuhagay ang Malacañang og usa ka bilyon ka pesos nga kon buot hunahunaon, sayon ra mang silhigon ang mga rebelde kon tinud-on gyud sa mga sundawo, nga dili kinahanglang mogasto ning maong kantidad.

Miingon usab si Dakay nga layo ra kaayo ang duha ka tuig kon may plano gyung tinud-anay ang militar pagpuhag sa mga rebelde sa nasud nga dili magkinahanglan og dakong kantidad sa kuwarta.

Apan bisan pa niini tungod kay kuwarta ang "bottomline", nga maoy gikondisyon sa mga kadagkoan sa militar ngadto sa Malacañang, mapugos ang Pamuno nasud sa pagtuman niini.

Midugang si Dakay nga wa lang gihapoy laing mag-antos kondili ang ekonomiya sa nasud ug ang mga Pilipino maoy makalulooy.

Ang malagmit mahitabo niini mao nga kon magkinahanglan na usab og kuwarta ang mga otoridad, magpasiugda dayon og gubat sa nasud aron mapugos ang kagamhanan sa pagpagawas og ikagasto niini.

Miingon si Dakay nga may pagtuo siya nga magmalinawon ang nasud kon ang tumong sa mga lider panguwarta lang ug dili gyud para sa kalinaw.