Hearing vs Koreano wala mahinayon

Hearing sa kasong pagpanglugos batok sa usa ka Koreano wala mahinayon gumikan sa kapakyas sa testigo sa prosekusyon pagtunga atol sa hearing sa milabay'ng semana.

Si Atty. Owen Alguso, abogado sa suspetsado nga si Yang Bing Yung miingon nga gikatakda unta nga ipresentar sa prosekusyon si Dra. Madeline Amadora kinsa maoy mihiling sa biktima nga midangop sa Vicente Sotto Memorial Medical Center niadtong Abril 5, 2006 human sa giingong pagpanglugos.

Matud pa ni Alguso nga dako kaayo og ikatabang ang paghatag og katin-awan ni Amadora sa korte kun nga- nong adunay findings nga nagpakita og ebidensiya nga duna gayud sexual abuse o contact sa biktima sanglit negatibo kini sa samad sa genitalia ug vagina.

Gumikan niini, si RTC branch 56 Judge Agustin Vestil mitakda pag-usab sa hearing karong Agosto 24, 2006 aron kahatagan og igong higayon ang prosekusyon sa pagpatunga sa ilang testigo.

Kahinumduman nga si Yang maoy gitumbok nga milugos sa usa ka 20-anyos nga dalaga nga usa ka katabang sa higala niini niadtong Pebrero 5 ning tuiga didto sa Gentle Breeze Subdivision sa H. Cortes, Mandaue.

Ang maong kaso nagpadayon bisan pa sa pagluwat og affidavit of desistance sa biktima gumikan kay ang korte wala motugot sa maong affidavit human nga milayas ang biktima ug wala na mopakita sa hukmanan.