Volunteer nakulatahan sa polis

Polis nga nakasakmit og toy gun sa usa ka sakop sa Centennial Force Foundation Inc ug Barangay Intelligence Network (BIN) nangulata nga maoy hinungdan nga girelibohan kini sa iyang hepe.

Ang nangulata ug girelibohan sa iyang puwesto mao si PO3 Rovillo Librado nga nadistino sa Presinto 1 sa Centro, Mandaue.

Si Angelito Sampilo nga CFI ug BIN sa Ibabao, Mandaue nalandig sa tambalan tungod sa mga samad ug bun-og niining naangkon.

Si Sr. Insp. Abraham Ocampo nga maoy hepe sa Presinto 1 ang miembargo gilayon sa kargada ni PO3 Librado ug miparelibo gilayon niini sa puwesto.

Sa pagpakighinabi sa Banat News kang Sr. Insp. Ocampo maoy iyang gipadayag nga off duty si Librado atol nga nahitabo kini niadtong miaging Sabado sa hapon.

Matud pa ni Ocampo nga mitumaw si PO3 Librado sa Presinto 1 ug namatikdan niini si Sampilo nga may nagbagal sa hawak nga maoy hinungdan nga girikisa kini.

Sa pagrikisa ni Librado maoy nakuha ang toy gun nga giluklok ni Sampilo nga maoy hinungdan sa kasuko ug gikulata.

Dugang pa ni Sr. Insp. Ocampo nga iyang gidis-armahan si PO3 Librado ug gidala sa tambalanan ang biktima.

Matud pa niya ang kasong administratiba ug pagpamun-og ang iyang ipasaka sa korte batok kang PO3 Librado alang sa pagpahamtang og tukmang silot sa salaod niining nahimo.