Nagpasalida'g bold

Balay nga dunay gamay'ng sinehan alang sa bastos nga salida gironda sa kapolisan diha sa dalan Belgium, Suba ning dakbayan kagahapon sa buntag, pipila sa mga nanan-aw mga menor de edad ug ang uban sa mga nanan-aw naaktuhang nagduwa sa ilang mga kinatawo atol sa paghasmag sa mga polis.

Arestado ang suspek nga giingong maoy operator niini nga si Eddie Katsila,35, residente sa nahisgutang dapit kinsa naaktuhang naningil og bayad sa usa ka manan-away dihang nangabot ang kapolisan.

Si SPO1 Alfredo Petallar sa Criminal Investigation and Intelligence Branch sa Cebu City Police Office mitug-an sa Banat News nga dugay na silang nakadawat og daghang impormasyon sa operasyon ni Katsila apan matag susihon ang dapit sarado kini ug walay salida.

"Dugay na mi nakadawat og reklamo ani, pero on-and-off lagi ang iyang operasyon," asoy pang Petallar.

Niadtong Biyernes usa ka inahan ang personal nga miduol kang Petallar ug misumbong nga nag-operate na usab kini og balik apan dihang gisubay sarado gihapon kini.

Kagahapon sa buntag ang maong ginang mi-text kang Petallar nga kasamtangang nagpasalida si Katsila hinungdan nga gidali nila kini og adto pasado ala una na sa hapon ug naaktuhan ang operasyon niini.

Ang mga nanan-aw matud pang Petallar daling nakakatkat sa mga bungbong ug nangambak bisan wala pa matarong og suot ang ilang mga shorts sa kahadlok nga madakpan.

Duha ka mga menor ang wala makadagan ug giturn-over na ngadto sa barangay hall sa maong dapit samtang gikuha sa kapolisan ang 29 inches nga telebisyong gipasalidahan, usa ka amplifier, duha ka speakers, usa ka vcd player ug mga x rated nga pirated vcd.

Si Katsila sa pakighinabi sa Banat News kusganong mihimakak nga siya maoy tag-iya sa maong pasalidahanan og x-rated sanglit igo lang siya nagbantay. Matud pa niya ang tag-iya niini usa ka ginganlan og Fred.

Si Petallar mitug-an ning pamantalaan nga base sa ilang impormasyon gibaligya na sa giilang si Fred ang maong pwesto kang Katsila ug mao na kini ang nag-operate niini.