Lovers gitulis

Managhigugmaay nga namasilong atol sa kusog nga pagbunok sa ulan sa miaging gabii gitulis sa nagbinugtong nga tulisan sa dalan Gomez, Centro, Mandaue.

Ang mga biktima mao sila si Vince Cuyos, 25, ulitawo, taga Tayud, Liloan ug Diadane Melencion, 24, dalaga nga taga Ouano Compound, Looc, Mandaue.

Nakuha sa tulisan gikan sa mga biktima mao ang ilang knapsack ug shoulder bag nga gisudlan sa ilang salapi nga P2,800 ug mahalon nga mga cellphone ug uban pa.

Sa nasayran sa Banat News kang PO2 Estephane Amamag-id sa Presinto 1 sa kapolisan sa maong dakbayan nga ang wala mailhing lalaki kalit lang mitumaw gikan sa luyong bahin sa mga biktima.

Gitionan sa armas ug mideklarar nga tulis ug gipangayo ang ilang mga butang dayong pahilayo sa maong dapit.

Matud pa ni PO2 Amamag-id nga nagpadayon pa karon ang ilang pakisusi sa maong pagpanulis nga ilang gituohan nga ang maong lalaki ang anaa lamang usab magpuyo sa maong dapit.