Pusher sa Mindanao nasikop

Gikatahapan nga pusher og shabu gikan sa Mindanao nadakpan sa kapolisan atol sa buy-bust operation nga gihimo sa kapolisan ug nasakmit ang lima ka pakete nga gituohang shabu.

Ang buy-bust operation sa kapolisan gipangulohan ni PO3 Mario Poblete nga ilang gihimo sa Marigondon, Lapu-Lapu sa miaging gabii.

Ang nadakpan mao si Roberto Hernandez alyas "Piklat", hingkod ang panuigon, ulitawo nga lumad nga taga Digos, Davao.

Si SPO2 Danny Tampus sa kapolisan sa dakbayan sa Lapu-Lapu nga gikahinabi sa Banat News miingon nga natigayon ang buy- bust operation nilang PO3 Poblete human sa pipila ka semana nilang pagpaniid sa ilegal nga kalihukan ni Hernandez.

Matud pa niya nga may mga pumapalit ang suspetsado sa maong dapit nga maoy hinungdan nga nakuha gyod sa lit-ag ang suspetsado dihang gisulayan kini og palit sa laing polis.

Gitanggong sa detention cell sa kapolisan sa maong dakbayan ang maong dinakpan.