Gibutyag ni Konsehal Sylvan Jakosalem, tsirman sa committee on transportation nga gisusi karon ang tanang anggulo ug sentro niini nga posibling job related ang maong panghitabo.
Sigun sa police report nga pirmado ni Chief Insp. Marlou Martinez, hepe sa Cebu City Traffic Group, si Magalso nagka-engkwentro kini sa mga PUJ drayber sa Mandaue niadtong Hunyo 19 sa gabii dihang nakadakop kini og duha ka mga PUJ drayber sa Mandaue diha sa dalan Osmeña Boulevard tungod sa traffic violation.
Ang maong panghitabo miresulta kini sa gamay'ng kagubot human misukol sa mga polis ang mga gidakop nga duha ka PUJ drayber nga sila si Wilmer Alcontin ug Leonides Tapilot.
Giklaro hinuon sa konsehal nga dili ang mga PUJ drayber sa Mandaue-Jones nga rota maoy sentro sa gipangdakop nila ni Magalso ug mga kaubanan niadtong tungora gumikan kay nag-monitor kini sa tanang mga PUJ nga posibleng migamit og peke nga prangkisa.
Kulang usab og pagtuo ang konsehal nga dunay kalambigitan sa maong panghitabo ang mga PUJ drayber sa Mandaue ilabi na ang Nagkahiusang Drayber sa Sugbo (NADSU) gumikan kay nagpadayon ang ilang negosasyon ning mga tungora alang sa pagsulbad sa padayong pagsupak nila sa City Ordinance 1837 nga nagdili na sa mga PUJ gikan sa Mandaue nga makasulod dinhi sa kinapusoran sa dakbayan.
Samtang kusganong gihimakak sa NADSU ang maong pasangil. Matud ni Tony Pogado, presidente sa NADSU malisyoso ang maong pasangil nga gidudahan niya gituyo kini aron dauton ang ilang pagpakigbisog pagsupak sa implementasyon sa ordinansa sa syudad.
Hinuon gikonpirmar sa konsehal nga sa wala pa mahitabo ang pagpusil ni Magalso niadtong higayona daan na kining nakadawat og mga pagpanghulga.
Nunot niini, gihangop sa konsehal ang paghilakip kang Magalso sa tulo ka mga polis nga gihatagan og medalya ingon man P5 mil nga ganti ni PRO-7 director Supt. Silverio Alarcio niadtong miaging adlaw.