Pekeng P500 gibayad sa rapist

Onse anyos nga batang babaye gilugos sa usa ka biyudo diha sa sulod sa balay niini diha sa dakbayan sa Toledo.

Nahitabo ang paglugos sa onse anyos nga bata niadtong Domingo ug gitaho sa kapolisan adto rang Martes, kini human gikuyogan sa uyoan sa biktima ug Mae Tacando sa Department of Social Welfare and Development (DSWD) sa Toledo.

Ang biktima mao si Ana (tinuod pangan gipugngan) nagpuyo sa usa sa mga barangay sa Toledo City.

Samtang ang gipasanginlan nga milugos sa biktima amo si Michael Glen Gindap, biyudo, hingkod ang pangidaron nga nagpuyo sa susamang lugar.

Si SPO2 Jerson Lebumpasil sa Toledo City Police Station nga maoy nag-imbestigar sa maong kaso, nagkanayon sa Banat News nga niadtong adlaw'ng Domingo ang suspetsado midani kaniya nga paadtuon siya sa balay ni Gindap tuod man niadto ang biktima sa pagtuo nga aduna lang kini ipabuhat, apan giingong gipasulod si Ana ngadto sa lawak ni Gindap ug didto gisugdan na sa paglugos ang biktima.

"Human milampos si Gindap sa iyang paglugos, sa wala pa gipapauli sa ilang balay ang bata gitagaan kini og P500 ug gisultihan ang biktima nga dili pasumbongon sa nahitabo kaniya ni bisan kinsa nga tawo" matud ni PO2 Lebumpasil.

Matud ni PO2 Lebumpasil nga ang 500 pesos nga gihatag ni Gindap ngadto ni Ana "fake" pa gayud.

Ang biktima uban sa iyang uyoan gikuyogan sa taga DSWD aron ipahiling sa doktor ang kinatawo niini.

Si Dr. Hermis Labrador, Medico Legal Officer sa dakbayan sa Toledo human sa gipahigayong paghiling ni Ana, nasuta nga positibo nga nalugos ang biktima.

Ang suspek nga si Gindap pabilin pa karong gawasnon, hinuon gipangita na sa kapolisan sa Toledo ang posibleng gidangpan niini.

Samtang ang biktima kasamtangan gikostudiya sa Department of Social Welfare and Development sa Toledo.