Tulo ka German nagkarambola

Nag-unay og rambol ang tulo ka mga German nationals sulod sa usa ka bar sa Pajo dakbayan sa Lapu-Lapu kagahapon sa kaadlawon. Ang biktima naila lamang sa ngan nga Freddie Peizl, legal ang panuigon, usa ka German national, kasamtangan nagpuyo sa Iba Basak dakbayan sa Lapu-Lapu.

Ang gitumbok nga responsable sa kagubot mao si Cluaf Hanz ug usa ka Tony nga German national ra usab nga nagpuyo sa Maribago dakbayan sa Lapu-Lapu.

Base sa pamahayag ni Anastasia Guerrero, tag-iya sa Guerrero's Place nga mikabat sa dul-an sa 9 mil ka pesos ang danyos sa kadaut nga mugna sa panagrambol sa maong mga German nationals.

Matud pa ni Guerrero nga unang miabot sa iyang club si Peizl gikan sa laing club apan gisundan kini sa duha niya ka mga kauban ug didto nahitabo ang ilang karambola.

Nasayran sa Banat News nga gikan ang tulo naglalis sa Hiedelberg Restaurant gumikan kay wa makauyon si Peizl sa bastos nga giluwatang pamahayag ni Hanz kalabot sa sex hinungdan sa ilang panaglalis.

Sa dihang mibalhin si Peizl sa gikahitaboan misunod usab sila si Hanz ug Tony hinungdan sa karambola, apan sa pagresponde sa kapolisan misibat ang mga suspek.

Gumikan niini gawas nga pabayron ni Guerrero si Hanz ug Tony sa danyos niini iya pa kining pasakaan og reklamo ngadto BID 7.

Nasayran usab sa Banat News nga si Tony usa ka professional boxer ug kanunay kining malambigit sa kagubot sa mga beer houses ug club sa dakbayan sa Sugbu, samtang si Hanz aduna na kiniy deperensiya sa panglawas.