CHD warning: Ayaw pataka'g palit pagkaon sa daplin-daplin

Ang mga ginikanan kinahanglang mobaod sa ilang mga anak nga dili magpataka pagpalit og makaon ilabi na sa mga tigbaligya og makaon nga anaa mahimutang kilid sa mga tunghaan.

Nabalaka ang mga opisyal sa Cebu City Health Department tungod kay ang statistics sa unang lima ka buwan karong tuiga miabot na og 251 ang nadala sa tambalanan human makasinati og sakit sa tiyan tungod sa amoebiasis.

Giangkon sa mga city health officials nga dili kaayo segurado ang kalimpyo sa pagkaon nga gibaligya sa mga sidewalk vendors kay hapit tanan kanila wala makasalmot og seminar sa food-handling.

Ang disease surveillance report nagpakita nga ang gidaghanon sa mga natakbuyan og amoebiasis misaka og 13 porsiyento kun itandi sa miaging tuig.

Bisan tuod walay namatay sa maong sakit, apan gihulagway sa mga tinugyanan sa maayong panglawas nga taas na kaayo kini kun itandi sa statistics sa milabay'ng lima ka tuig.

Ang Labangon maoy nag-una sa mga barangay dinhi sa dakbayan nga labing daghan og kaso sa amoebiasis, 16, ug gisundan sa Talamban, 14 ug Bacayan, 13.

Matud sa mga city health officials nga sagad sa mga natakboyan sa maong sakit mga babaye.

Ang amoebiasis masinati pinaagi sa kanunay'ng pagsakit sa tiyan tungod kay ang "stomach organs" maoy sagad atakehon sa kagaw nga gitawag og Etamoeba histolytica, nga mamugna sa hugaw'ng pagkaon.

Sagad sa matakbuyan niining maong sakit magkalibanga apan kanunay'ng magping-it sa kasakit sa ilang tiyan, pirmeng uhawon, dili ganahan mokaon, magsukasuka ug kun dili mabantayan mahutdan sa tubig ang biktima.