Sila si SPO3 Reynaldo Matillano ug PO2 David Enterina sa Criminal Investigation and Detection Group 7 ug PO3 Allan Magalso sa Traffic Group sa Cebu City Police Office nakadawat sa "Medalya ng Sugatang Magiting" samtang nagpaalim sa ilang mga samad pinusilan diha sa usa ka pribadong tambalanan dinhi sa Sugbu.
Matud pang Alarcio sa pakighinabi sa mga tigbalita nga kun unsa ang kapolisan kadali nga makasilot sa ilang mga badlungong mga polis mao usab sila kapaspas sa paghatag og pasidungog ngadto sa mga polis nga magtinarong sa ilang trabaho.
Subling gipahimangnoan ni Alarcio ang tanang mga polis nga di mokumpiyansa sa tanang operasyon ug dili i-underestimate ang ilang mga dakpunon sanglit dili tanang panahon di mosukol ang mga kriminal.
Dugang pa ni Alarcio nga angayang hugot gyud nga ipatuman sa kapolisan ang body-body system aron di basta mahitabo ang susamang mga insidente diin ang mga polis nangapusilan.
Sila si Matillano ug Enterina napusilan sa suspetsadong drug pusher nga si Jayvee Miag-ao diha sa Tayud, Liloan niadtong milabay'ng kaadlawon sa adlaw'ng Martes atol sa gihimong buy-bust operation, ang duha parehong nakabalos apan nakaikyas gihapon ang suspek nga gituohang naangol usab.
Samtang si Magalso giluyo pagpusil sa nag-inusarang lalaking luwan sa usa ka motorsiklo diha sa dalan Katipunan, Labangon ning dakbayan niadtong Martes sa gabii dihang ang polis dunay gidakop nga motorsiklo.
Gawas sa medalya gihatagan usab sila og tag P5,000 nga tabang pinansyal gikan sa personal nga bulsa ni Alarcio ug misaad kining magpatabang sa Camp Crame nga tabangan ang mga samaron sa ilang hospital expenses .