Polis nga hubog mikulata sa drayber nakulatahan

Nabalhog sa karsel sa Mabolo police station nga napuno og bun-og sa kalawasan ang usa ka hubog nga polis human kini giingong mikulata sa usa ka drayber sa taksi nga iyang gisakyan diha sa Barangay Luz ning dakbayan sa milabay'ng gabii.

Ang maong polis giilang si SPO1 Edsel Condevillamar, 44, residente sa Tuburan ug kasamtangang nadestino sa Provincial Mobile Group sa Cebu Provincial Police Office.

Usa ka Jose Cullano, 57, residente sa Pakigne, Minglanilla kinsa maoy drayber sa taksi nga gisakyan sa suspek gikan sa Waterfront Hotel and Casino sa Lahug ning dakbayan.

Sigun pa sa biktima ngadto sa mga tigbalita nga gisakyan siya sa suspek diha sa maong hotel apan una pa kini mahitabo nakit-an niyang naglalis ang suspek ug ang usa ka gwardiya.

Human makasakay si Condevillamar matud pa sa drayber iya kining gipangutana nganong naglalis sila sa gwardiya apan gikatahong kalit siyang gikulata sa suspek diha sa sulod sa taxi hinungdan sa iyang bun-og sa mata ug pagkahubag sa iyang kumingking.

Dali niyang giliko ang taxi padulong sa Barangay Luz diin nagpakitabang siya sa mga tanod nga sila si Manuel Vicentino, Guilberto Baculi ug Samuel Lastimoso.

Giingong ang mga istambay sa palibot maoy mitabang og kulata kang Condevillamar maong gikuha kini sa mga tanod ug gidala sa Mabolo police station.

Si Condevillamar nga giingong nagwala pa sulod sa maong presinto maong gipailawom siya sa liquor test sa Cebu City Police Office diin mitumaw nga positibo kini sa ilimnong makahubog.

Giingong gikan sa usa ka party ang maong polis ug hubog na kining mianha sa maong hotel maong wala kini pasudla sa gwardiya hinungdan sa ilang panaglalis.