Bangko 'gilungkab' apan napakyas

Bangko sulod sa MEPZA I gilungkab niadtong milabay'ng adlaw diin way swerte ang kawatan kay nahikapan ang burglar alarm nga nagkutay sa kapolisan sa MEPZA ug sa dakbayan sa Lapu-Lapu.

Ang gilungkab mao ang Equitable PCI bank nga naa sud sa MEPZ I diin gidumala ni Mr. Hilarion C. Lisen ang Banking Central Head sa maong buhatan.

Base sa imbestigasyon ni Sgt. Danilo Ledesma sa MEPZ Police mga alas 12:30 sa kaadlawon sa milabay'ng Domingo mitingog ang burglar alarm sa maong bangko ug sa ilang pagresponde negatibo kini sa mga kasikas.

Sa milabay'ng Lunes, usa ka Efren Cligtar, security guard nga sakop sa Kampilan Security agency ug nadestino sa Equitable PCI sud sa MEPZ I ang mitaho sa kapolisan sa MEPZ diin gipanglungkab ang mga drawer sa mga empleyado sa maong bangko atol sa pagsud niini sayo sa buntag.

Atol sa pagresponde sa kapolisan sa MEPZ ilang nakita nga gipamutol sa mga kawatan ang tanang wire nga nagkutay sa maong bangko ngadto sa mainline lahos sa poste apan bugtong ang wire sa burglar alarm ang wala maputol.

Gituuhan sa likod nga bahin sa maong edipisyo miagi ang mga kawatan sa aircon frame sa dihang gitulod lamang ang aircon unit pasulod sa bangko.

Dako ang kalipay ni Lisen sa dihang way bisan usa ka butang ang nawagtang sa maong bangko lakip na ang kwarta nga anaa sa vault, bugtong ang mga drawer lang sa mga empleyado ang nangaguba sa dihang gipugos kini paglungkab sa mga kawatan.

Atol sa maong insidente miresponde usab ang mga sakop sa TRS sa kapolisan sa dakbayan sa Lapu-Lapu ug ang SOCO diin gipangunayan ni P/Supt. Edgardo Leneso ang hepe sa finger prints sa PNP Crime Laboratory nga nakakuha usab og pipila ka mga ebidensiya sa crime scene.